لاہور( سپورٹس ڈیسک) پاکستان کرکٹ بورڈ (پی سی بی) کے چیئرمین محسن نقوی نے پی ایس ایل 11 کے شیڈول میں تبدیلی پر شائقین کرکٹ سے معذرت کی ہے۔ اس موقع پر لاہور میں پی ایس ایل 11 کی تمام ٹیموں کے اعزاز میں ایک تقریب بھی منعقد کی گئی۔چیئرمین پی سی بی نے ملکی و غیر ملکی کھلاڑیوں اور معزز شخصیات کا پرتپاک استقبال کیا۔ تقریب کے دوران پی ایس ایل 11 کی ٹرافی کی رونمائی کے ساتھ ساتھ اس کا نیا ترانہ بھی پیش کیا گیا۔محسن نقوی نے کہا کہ شائقین کرکٹ سے دل کی گہرائیوں سے معذرت خواہ ہیں، تاہم قومی و ملکی مفاد سب سے پہلے آتا ہے۔ انہوں نے بتایا کہ خطے کی موجودہ صورتحال کی وجہ سے قومی مفادات کو مدنظر رکھتے ہوئے پی ایس ایل 11 کو محدود کیا گیا ہے اور یقین ہے کہ آج کی یہ قربانی مستقبل میں آسانی کی صورت سامنے آئے گی۔چیئرمین پی سی بی نے مزید کہا کہ پی ایس ایل ایک ٹاپ انٹرنیشنل برانڈ بن چکا ہے اور اسے مزید آگے لے کر جانا ہے۔تقریب میں وفاقی وزراء محمد اورنگزیب، عطاءاللہ تارڑ، سالک حسین، علی پرویز ملک، اسپیکر پنجاب اسمبلی ملک محمد احمد خان، سینئر صوبائی وزیر مریم اورنگزیب، صوبائی وزیر شافع حسین، طلحہ برکی، اٹارنی جنرل منصور اعوان اور سابق وفاقی وزیر گوہر اعجاز سمیت فرنچائز مالکان، ہیڈ کوچ پاکستان ٹیم، قومی کھلاڑی اور پی ایس ایل کے لیے آئے ہوئے بین الاقوامی کھلاڑی بھی شریک ہوئے۔
