تہران( مانیٹرنگ ڈیسک)رواں سال ایران سے 4 لاکھ 39 ہزار سے زائد غیر قانونی افغان شہریوں کو ملک بدر کردیا گیا۔اقوام متحدہ کے ادارہ برائے مہاجرین کی نئی رپورٹ کے مطابق ایران سے واپس بھیجے گئے افغان شہریوں میں 86 فیصد ایسے افراد شامل تھے جو قانونی دستاویزات کے بغیر مقیم یا غیر رجسٹرڈ تھے۔رپورٹ کے مطابق بڑی تعداد میں افغان شہریوں کی واپسی سے افغانستان میں رہائش، روزگار اور بنیادی سہولیات پر دباؤ بڑھ گیا ہے، جبکہ سیکڑوں افغان نوجوان خطرناک راستوں سے ایران پہنچنے کی کوشش کے دوران جان سے ہاتھ دھو چکے ہیں۔معاشی و سیکیورٹی ماہرین کے مطابق طالبان کی پالیسیوں اور عالمی قوانین کی پاسداری نہ ہونے کے باعث افغانستان کی مشکلات میں اضافہ ہوا ہے، جس کے اثرات عام شہریوں کو بھگتنا پڑ رہے ہیں۔ایران کی جانب سے غیر قانونی نقل و حرکت کے خلاف کارروائیوں اور ملک بدری میں تیزی سے ظاہر ہوتا ہے کہ خطے کے ممالک سیکیورٹی خدشات کے پیش نظر غیر قانونی آمدورفت کے خلاف اقدامات کر رہے ہیں۔
