نیپیداو( مانیٹرنگ ڈیسک) میانمار کی ریاست شین کے علاقے میں ایک زور دار دھماکے کے نتیجے میں 55 افراد ہلاک اور متعدد زخمی ہوگئے، ہلاک ہونے والوں میں 25 خواتین بھی شامل ہیں۔غیر ملکی میڈیا کے مطابق دھماکا کونگ ٹیٹ کے علاقے میں پیش آیا، جہاں علیحدگی پسند گروہ ٹینگ نیشنل لبریشن آرمی کے زیرِ استعمال کان کنی مواد موجود تھا۔تنظیم کے ترجمان کے مطابق ابتدائی طور پر یہ واقعہ حادثاتی دھماکا معلوم ہوتا ہے، تاہم اس کی وجوہات جاننے کے لیے تحقیقات جاری ہیں۔بیان میں کہا گیا ہے کہ واقعے میں جاں بحق ہونے والوں کے اہل خانہ سے تعزیت کی جاتی ہے جبکہ زخمیوں کی جلد صحت یابی کے لیے نیک خواہشات کا اظہار کیا گیا ہے۔مقامی ذرائع کے مطابق دھماکے سے قریبی رہائشی مکانات کو بھی نقصان پہنچا، جبکہ عینی شاہدین نے بتایا کہ دھماکے کی شدت اس قدر زیادہ تھی کہ اسے فضائی حملے جیسا محسوس کیا گیا۔
