اسلام آباد( پاکستان خبر) نیشنل ڈیٹا بیس رجسٹریشن اتھارٹی (نادرا) نے پاکستان میں تیار کردہ کیو آر کوڈ پر مبنی نیا قومی شناختی کارڈ متعارف کرا دیا۔نادرا کے مطابق نیا شناختی کارڈ پولی کاربونیٹ مٹیریل سے ملک میں تیار کیا گیا ہے، جبکہ درآمد شدہ مائیکروچپ کی جگہ محفوظ کیو آر کوڈ شامل کیا گیا ہے۔اعلامیے کے مطابق عام اسمارٹ فون کے ذریعے بھی نئے شناختی کارڈ کی تصدیق ممکن ہوگی۔ پاک آئی ڈی موبائل ایپ کے ذریعے کارڈ پر موجود کیو آر کوڈ اسکین کرکے شناخت کی تصدیق کی جاسکے گی۔کیو آر کوڈ میں کارڈ ہولڈر کی متعلقہ شناختی معلومات اور تصویر موجود ہوگی، جبکہ اس نظام سے نام، پتے اور دیگر معلومات کے ڈیٹا اندراج میں غلطیوں کو کم کرنے میں مدد ملے گی۔نادرا کے مطابق ٹیلی کام کمپنیوں، بینکوں، اسپتالوں، ریلوے، پولیس اور دیگر متعلقہ اداروں کو کیو آر کوڈ کی تصدیق کے لیے سافٹ ویئر فراہم کیا جائے گا۔نئے شناختی کارڈ پر خاندان نمبر کے علاوہ معذور افراد، بزرگ شہریوں اور اعضا عطیہ کرنے والوں کے لیے مخصوص نشانات بھی موجود ہوں گے۔
