لاہور ( سپورٹس ڈیسک)نیشنل سائبر کرائم انویسٹی گیشن ایجنسی (این سی سی آئی اے) نے قومی کرکٹ ٹیم کے کھلاڑیوں کو طلب کرلیا۔ذرائع کے مطابق پاکستان کرکٹ بورڈ (پی سی بی) نے بعض کرکٹرز کے موبائل فون تحویل میں لے کر متعلقہ ادارے کو بھجوا دیے تھے۔ذرائع کا کہنا ہے کہ این سی سی آئی اے نے امام الحق اور محمد رضوان سمیت ایک اور کرکٹر کو نوٹس جاری کرتے ہوئے طلب کیا ہے۔این سی سی آئی اے کھلاڑیوں کے موبائل فون سے حاصل ہونے والی معلومات کی بنیاد پر تحقیقات کرے گی، تاہم پی سی بی کی جانب سے اب تک یہ وضاحت نہیں کی گئی کہ کرکٹرز کے موبائل فون کس وجہ سے تحویل میں لیے گئے۔ذرائع کے مطابق امام الحق اور محمد رضوان کل این سی سی آئی اے لاہور میں پیش ہوں گے۔ دونوں کھلاڑیوں کو پیر کے روز نوٹس جاری کیے گئے تھے، جن میں انہیں جمعہ کو این سی سی آئی اے لاہور طلب کیا گیا۔ذرائع نے بتایا کہ دونوں کرکٹرز کے موبائل فون ان لاک کروا کر انگلینڈ سیریز کے دوران ڈریسنگ روم سے معلومات لیک ہونے کے معاملے سے متعلق ان سے پوچھ گچھ اور تحقیقات کی جائیں گی۔
