تل ابیب( مانیٹرنگ ڈیسک) اسرائیلی وزیرِاعظم بنجمن نیتن یاہو نے امریکی نائب صدر جے ڈی وینس کے اس بیان سے اختلاف کیا ہے جس میں انہوں نے کہا تھا کہ امریکا دنیا میں اسرائیل کا واحد طاقتور اتحادی رہ گیا ہے۔فاکس نیوز کو دیے گئے ایک انٹرویو میں نیتن یاہو نے کہا کہ وہ جے ڈی وینس کا احترام کرتے ہیں اور ان کے ساتھ خوشگوار تعلقات رکھتے ہیں، تاہم اس کا یہ مطلب نہیں کہ وہ ان کی ہر رائے سے اتفاق کریں۔انہوں نے اسرائیل کے سفارتی طور پر تنہا ہونے کے تاثر کو مسترد کرتے ہوئے کہا کہ امریکا کے علاوہ بھی کئی ممالک اسرائیل کے ساتھ مضبوط تعلقات رکھتے ہیں۔نیتن یاہو نے بھارت کا حوالہ دیتے ہوئے کہا کہ 1.4 ارب آبادی والا ملک اسرائیل کا اہم دوست ہے اور وہاں اسرائیل کو بھرپور حمایت حاصل ہے۔اسرائیلی وزیرِاعظم نے زور دے کر کہا کہ اسرائیل کی عالمی سطح پر متعدد شراکت داریاں موجود ہیں اور اسے صرف ایک ملک کی حمایت تک محدود قرار دینا درست نہیں۔
