کوئٹہ( کامرس ڈیسک)بلوچستان حکومت نے صوبے بھر میں کاروباری مراکز کے اوقاتِ کار کے نئے ضابطے جاری کر دیے ہیں۔نوٹیفکیشن کے مطابق بلوچستان میں دکانیں، مارکیٹس، شاپنگ مالز اور بازار رات 9 بجے بند ہوں گے۔ شادی ہالز، مارکیز اور دیگر تقریباتی مقامات کو رات 10 بجے تک کھلا رکھنے کی اجازت دی گئی ہے۔اسی طرح ریسٹورنٹس، کیفے اور فوڈ آؤٹ لیٹس رات 11 بجے تک کام کر سکیں گے، جبکہ ٹیک اوے اور ہوم ڈیلیوری سروسز کو اوقاتِ کار کی پابندی سے استثنیٰ حاصل ہوگا۔حکومتی اعلامیے کے مطابق صحت کے شعبے سے متعلق ادارے جیسے فارمیسیز، اسپتال، کلینکس اور لیبارٹریز پابندی سے مستثنیٰ ہوں گے۔ بیکریز، تنور اور دودھ و ڈیری شاپس کو بھی اس فیصلے سے چھوٹ دی گئی ہے۔مزید یہ کہ پیٹرول پمپس، سی این جی اسٹیشنز اور الیکٹرک وہیکل چارجنگ پوائنٹس پر بھی اوقاتِ کار کی پابندی لاگو نہیں ہوگی۔ جمنازیم، کھیلوں کی سہولیات، آئی ٹی کمپنیوں اور کال سینٹرز کو بھی استثنیٰ حاصل رہے گا۔حکومت کے مطابق یہ اقدام شہری سہولت، ٹریفک دباؤ میں کمی اور انتظامی بہتری کے لیے کیا گیا ہے۔
