پیٹرول ریلیف اسکیم میں موٹرسائیکل، رکشہ صارفین کیلئے نئی رعایت کا اعلان

 اسلام آباد( کامرس ڈیسک)وزیراعظم شہباز شریف نے پیٹرول ریلیف اسکیم کا دائرہ بڑھاتے ہوئے 5 لیٹر سے کم پیٹرول خریدنے والے موٹرسائیکل، چنگ چی اور رکشہ صارفین کے لیے بھی رعایت دینے کا فیصلہ کیا ہے۔حکومتی بیان کے مطابق خصوصی ریلیف اسکیم کے تحت ملک بھر میں پیٹرول پر 100 روپے فی لیٹر رعایت جاری ہے۔ عوام سے موصول ہونے والی تجاویز اور آرا کی روشنی میں وزیراعظم نے نئی سہولت کی منظوری دی ہے۔نئے فیصلے کے تحت 5 لیٹر سے کم پیٹرول لینے والے موٹرسائیکل، چنگ چی اور رکشہ صارفین کو ایک ٹوکن کے ذریعے ہفتے میں 500 روپے کی رعایت ملے گی۔ ہر ہفتے ایک ٹوکن جاری ہوگا، جبکہ ایک ماہ میں مجموعی طور پر چار ٹوکن دیے جائیں گے۔800 سی سی تک کی گاڑیوں کے لیے موجودہ طریقہ کار برقرار رہے گا۔ ایسے صارفین کو ہر 10 روز بعد 10 لیٹر پیٹرول پر فی لیٹر 100 روپے رعایت ملے گی اور ماہانہ تین ٹوکن جاری کیے جائیں گے۔حکومت نے اسکیم کے مستحق افراد کے لیے رجسٹریشن کا پیغام بھی مفت کرنے کا اعلان کیا ہے۔ اس کے علاوہ 20 سال پرانی موٹرسائیکلوں، رکشوں اور چنگ چی رکشوں کو بھی اسکیم میں شامل کرلیا گیا ہے۔ یکم جنوری 2006 کے بعد رجسٹرڈ تمام متعلقہ گاڑیاں اب رجسٹریشن کی اہل ہوں گی۔وزیراعظم نے اسکیم کی خود نگرانی کرتے ہوئے ریلیف کے دائرہ کار میں مزید توسیع اور صارفین کو رعایت آسان، باعزت اور بلا رکاوٹ فراہم کرنے کی ہدایت کی ہے۔