اسلام آباد( کامرس ڈیسک)انشورنس صارفین کے تحفظ کے لیے سکیورٹیز اینڈ ایکسچینج کمیشن آف پاکستان نے انشورنس کمپنیوں کے لیے مارکیٹ کنڈکٹ رولز 2026ء کا مسودہ رائے عامہ کے لیے جاری کردیا۔مجوزہ قواعد کا اطلاق صرف انفرادی انشورنس پالیسیوں پر ہوگا، جبکہ پالیسی کے اجرا سے کلیم کی ادائیگی تک کمپنیوں کی ذمہ داریاں بھی واضح کی گئی ہیں۔مسودے کے تحت لائف انشورنس کلیم پر متعلقہ دستاویزات موصول ہونے کے بعد 20 دن میں فیصلہ کرنا ہوگا۔ موٹر انشورنس کلیم پر سروے رپورٹ ملنے کے بعد 5 دن جبکہ دیگر نان لائف انشورنس کلیمز پر 7 دن میں فیصلہ کرنے کی تجویز دی گئی ہے۔کلیم منظور ہونے کے بعد انشورنس کمپنی کو 7 دن کے اندر ادائیگی کرنا ہوگی۔ اسی طرح اسپتال میں داخل مریض کے ہیلتھ انشورنس کلیم کو 20 دن میں نمٹانا ہوگا، جبکہ اسپتال سے ڈسچارج کی منظوری 3 گھنٹے میں دینا لازم ہوگی۔
