نیویارک(ویب ڈیسک)واٹس ایپ اینڈرائیڈ صارفین کے لیے ایک نیا اور دلچسپ فیچر متعارف کرانے پر کام کر رہا ہے، جس کے تحت صارفین ممکنہ طور پر ایپ کھولے بغیر ہی وائس نوٹس ریکارڈ کرکے بھیج سکیں گے۔ٹیکنالوجی ویب سائٹ “ڈبلیو اے بیٹا انفو” کے مطابق یہ فیچر واٹس ایپ اینڈرائیڈ بیٹا ورژن میں دریافت ہوا ہے، تاہم یہ ابھی ابتدائی مراحل میں ہے اور عام صارفین کے لیے ٹیسٹنگ کے طور پر دستیاب نہیں کیا گیا۔رپورٹس کے مطابق واٹس ایپ ایک نیا ہوم اسکرین ویجیٹ تیار کر رہا ہے، جو اینڈرائیڈ فونز کی اسکرین پر مخصوص سائز میں دستیاب ہوگا اور صارف اپنی سہولت کے مطابق اس کا سائز بھی تبدیل کر سکیں گے۔اس ویجیٹ میں ایک سادہ انٹرفیس ہوگا جس میں صرف مائیکروفون کا آئیکن اور “ٹیپ ٹو ریکارڈ” کی ہدایت شامل ہوگی۔ صارف جیسے ہی اس پر ٹیپ کرے گا، وائس نوٹ کی ریکارڈنگ شروع ہو جائے گی، اور بعد میں اسے مطلوبہ رابطے کو بھیجنے کا آپشن ملے گا۔نئے فیچر میں ایک اور اہم سہولت “ایک ساتھ بھیجنے” کا امکان بھی شامل ہو سکتا ہے، جس کے ذریعے ایک ہی وائس میسج کو متعدد افراد کو بیک وقت بھیجا جا سکے گا۔
