شمالی کوریا کا ایک ماہ میں چوتھا میزائل تجربہ، جاپان اور جنوبی کوریا کی مذمت

شمالی کوریا ( مانیٹرنگ ڈیسک)شمالی کوریا نے متعدد بیلسٹک میزائلوں کے تجربات کیے ہیں، جو ایک ماہ کے دوران اس کا چوتھا میزائل تجربہ ہے۔ اس اقدام پر جاپان اور جنوبی کوریا نے شدید ردعمل کا اظہار کیا ہے۔برطانوی خبر رساں ادارے کے مطابق جنوبی کوریا کی فوج نے بتایا کہ شمالی کوریا نے پیر کے روز اپنے مشرقی ساحل کے قریب سمندر کی جانب متعدد بیلسٹک میزائل داغے۔ ان میں سے ایک میزائل نے 900 کلومیٹر سے زائد فاصلہ طے کیا۔جاپان نے شمالی کوریا کے میزائل تجربے کی سخت الفاظ میں مذمت کی ہے۔ جاپانی وزیر دفاع کے مطابق بیجنگ میں قائم جاپانی سفارت خانے کے ذریعے شمالی کوریا کے خلاف باضابطہ احتجاج ریکارڈ کرایا گیا ہے۔دوسری جانب جنوبی کوریا کے قومی سلامتی کے دفتر نے بھی میزائل تجربات کو قابلِ مذمت قرار دیتے ہوئے کہا ہے کہ یہ اقدامات اقوام متحدہ کی سلامتی کونسل کی قراردادوں کی خلاف ورزی ہیں۔جنوبی کوریا نے شمالی کوریا سے مطالبہ کیا ہے کہ وہ ایسے میزائل تجربات اور اشتعال انگیز کارروائیاں فوری طور پر بند کرے۔