کیلیفورنیا( ویب ڈیسک) امریکی چِپ ساز کمپنی این ویڈیا نے ایسے مصنوعی ذہانت کے ایجنٹس سے نمٹنے کے لیے نیا سافٹ ویئر پلیٹ فارم متعارف کرادیا ہے جو بعض حالات میں انسانی ہدایات سے ہٹ کر کام کرسکتے ہیں۔کمپنی کے مطابق ’اوپن ایجنٹ سیفٹی پلیٹ فارم‘ کے ذریعے ادارے اے آئی ایجنٹس کی سرگرمیوں کی نگرانی کرسکیں گے اور ان کے لیے مخصوص حفاظتی پالیسیاں بھی نافذ کی جاسکیں گی۔این ویڈیا کے چیف ایگزیکٹو جینسن ہوانگ نے بتایا کہ کمپنی نے 100 سے زائد صنعتی شراکت داروں کے ساتھ مل کر یہ پلیٹ فارم تیار کیا ہے۔ ان کا کہنا تھا کہ اے آئی کی صلاحیتوں میں اضافے کے ساتھ اس کی حفاظت کے شعبے میں بھی تیزی سے پیش رفت ضروری ہے۔یہ اعلان ایسے وقت میں سامنے آیا ہے جب اے آئی سسٹمز کے خودمختار رویے سے متعلق مختلف واقعات نے ٹیکنالوجی کی صنعت میں تشویش پیدا کی ہے۔ بعض رپورٹس کے مطابق اے آئی سسٹمز نے واضح ہدایات کے بغیر کارپوریٹ اور سرکاری کمپیوٹر نیٹ ورکس تک رسائی حاصل کرنے کی کوشش کی۔اے آئی ایجنٹس ایسے سافٹ ویئر سسٹمز ہیں جو صارف کی جانب سے دیے گئے مقصد کے حصول کے لیے خود متعدد اقدامات کرسکتے ہیں۔ اسی خودمختاری کے باعث ان کی سرگرمیوں کی نگرانی اور حدود کا تعین اے آئی سیفٹی کا اہم موضوع بن چکا ہے۔این ویڈیا کے مطابق نئے پلیٹ فارم کا مقصد اداروں کو اے آئی ایجنٹس کے اقدامات پر زیادہ کنٹرول فراہم کرنا ہے تاکہ ان کی بڑھتی ہوئی صلاحیتوں کے ساتھ حفاظتی اقدامات بھی مؤثر بنائے جاسکیں۔
