نیویارک( کامرس ڈیسک) ایران اور امریکا کے درمیان امن مذاکرات میں پیشرفت نہ ہونے اور تیل بردار ٹینکرز پر حملوں کی اطلاعات کے بعد عالمی مارکیٹ میں خام تیل کی قیمتوں میں نمایاں اضافہ ہوگیا۔کاروباری سرگرمیوں کے دوران برینٹ خام تیل کی قیمت 1.45 ڈالر یا 1.67 فیصد بڑھ کر 88.52 ڈالر فی بیرل ہوگئی، جبکہ امریکی خام تیل ویسٹ ٹیکساس انٹرمیڈیٹ کی قیمت 1.15 ڈالر اضافے کے بعد 82.40 ڈالر فی بیرل پر پہنچ گئی۔ہفتہ وار بنیاد پر برینٹ خام تیل کی قیمت میں تقریباً 6 فیصد جبکہ ڈبلیو ٹی آئی میں 5.4 فیصد اضافے کا امکان ظاہر کیا جا رہا ہے۔آئل مارکیٹ کے ماہر اینڈریو لیپوو کے مطابق نئے حملوں کی اطلاعات اور جنگ بندی مذاکرات میں خاطر خواہ پیشرفت نہ ہونے کے باعث ہفتے کے اختتام پر تیل کی قیمتوں میں تیزی دیکھی گئی۔انہوں نے خبردار کیا کہ اگر آبنائے ہرمز میں بحری آمدورفت کی رکاوٹیں برقرار رہیں تو صورتحال مزید سنگین ہوکر بڑے بحران کی شکل اختیار کرسکتی ہے۔
