عمان کے قریب کارگو جہاز پر حملہ، عالمی منڈی میں تیل کی قیمتوں میں اضافہ

لندن( کامرس ڈیسک) عمان کے جنوب مشرقی ساحلی علاقے میں کارگو جہاز پر پروجیکٹائل حملے کے بعد عالمی منڈی میں تیل کی قیمتوں میں اضافہ ریکارڈ کیا گیا ہے۔برطانوی میری ٹائم ایجنسی کے مطابق عمان سے ساڑھے سات ناٹیکل میل کے فاصلے پر موجود ایک جہاز کو نامعلوم پروجیکٹائل سے نشانہ بنایا گیا، جس کے باعث جہاز کے اگلے حصے کو نقصان پہنچا۔اس واقعے کے بعد عالمی منڈی میں خام تیل کی قیمتوں میں تقریباً دو فیصد سے زائد اضافہ دیکھا گیا۔رپورٹس کے مطابق برینٹ خام تیل کی قیمت 1.52 ڈالر (2.1 فیصد) اضافے کے بعد 75.26 ڈالر فی بیرل ہو گئی، جبکہ ویسٹ ٹیکساس انٹرمیڈیٹ خام تیل 1.58 ڈالر (2.3 فیصد) اضافے کے ساتھ 71.92 ڈالر فی بیرل پر پہنچ گیا۔خبر رساں ادارے کے مطابق اس سے قبل گزشتہ روز خام تیل کی قیمتیں 27 فروری کے بعد اپنی کم ترین سطح پر بند ہوئی تھیں، یعنی جنگ شروع ہونے سے ایک دن پہلے کی صورتحال کے قریب۔