کیلیفورنیا (دنیا نیوز) میٹا نے صارفین کے لیے نئی سبسکرپشن سروس ’میٹا ون‘ متعارف کرا دی، جس میں فیس بک، انسٹاگرام، واٹس ایپ اور میٹا اے آئی کی الگ الگ سبسکرپشنز کو ایک ہی بنڈل میں شامل کیا گیا ہے۔میٹا کے مطابق ’میٹا ون‘ صارفین کو مختلف ایپس پر متعدد جدید اے آئی فیچرز اور پیشہ ورانہ ٹولز تک رسائی فراہم کرے گی۔کمپنی کا کہنا ہے کہ نئی سروس کے ذریعے انسٹاگرام پلس، فیس بک پلس اور واٹس ایپ پلس کے 50 سے زائد فیچرز ایک ہی سبسکرپشن میں دستیاب ہوں گے۔میٹا کے مطابق تینوں سروسز کے موجودہ صارفین کی تعداد ڈیڑھ کروڑ سے زیادہ ہوچکی ہے۔ صارفین کے لیے ’کور‘ اور ’پریمیم‘ پلانز بھی متعارف کرائے گئے ہیں، جن میں اے آئی کے ذریعے تصاویر اور ویڈیوز بنانے کے مزید جدید آپشنز شامل ہوں گے۔کریئیٹرز کے لیے تینوں سروسز پر مشتمل مشترکہ بنڈل کی ماہانہ فیس 1,750 روپے سے شروع ہوگی، جبکہ صرف فیس بک پلس کی ماہانہ سبسکرپشن 299 روپے میں دستیاب ہوگی۔
