کیلیفورنیا( ویب ڈیسک) ٹیکنالوجی کمپنی اوپن اے آئی نے جدید ترین تصویری تخلیق کا ماڈل چیٹ جی پی ٹی امیجز 2.5 پیش کردیا، جو چیٹ جی پی ٹی، چیٹ جی پی ٹی ورک اور کوڈیکس پر دستیاب ہے۔کمپنی کے مطابق نیا ماڈل اپریل میں جاری کیے گئے امیجز 2.0 کے مقابلے میں زیادہ تیزی سے تصاویر تیار کرتا ہے، جبکہ اس میں بہتر ایڈیٹنگ اور تصویروں میں موجود کرداروں و اشیا کی شکل برقرار رکھنے کی صلاحیت بھی بہتر کی گئی ہے۔اوپن اے آئی کا کہنا ہے کہ امیجز 2.5 میں روشنی زیادہ قدرتی، بافتیں زیادہ حقیقت سے قریب اور مختلف مراحل میں ترمیم کے دوران اصل تصویر کے عناصر کو برقرار رکھنے کی صلاحیت زیادہ مؤثر ہوگئی ہے۔ تصویر بنانے کا وقت بھی امیجز 2.0 کے مقابلے میں 50 فیصد تک کم کیا گیا ہے۔نئے ماڈل میں اسکیچ نامی سہولت بھی شامل کی گئی ہے، جس کے ذریعے صارف چیٹ جی پی ٹی میں کسی تصویر یا ترتیب کا سادہ خاکہ بنا کر اسے حتمی تصویر تیار کرنے کے لیے بصری رہنما کے طور پر استعمال کرسکتا ہے۔اس کے علاوہ صارفین کو تصویر شیئر کرتے وقت اسے تیار کرنے کے لیے استعمال کیا گیا پرامپٹ بھی ساتھ شیئر کرنے کی سہولت دی گئی ہے، جس سے دوسرے افراد اسی خیال کو اپنی تصاویر اور تفصیلات کے مطابق دوبارہ استعمال کرسکیں گے۔
