تل ابیب( مانیٹرنگ ڈیسک) اسرائیلی وزارتِ صحت نے بتایا ہے کہ ایران کے ساتھ جنگ شروع ہونے کے بعد سے اب تک 1900 سے زائد زخمی افراد اسرائیل کے مختلف اسپتالوں میں منتقل ہو چکے ہیں۔وزارتِ صحت کے مطابق گزشتہ 24 گھنٹوں کے دوران 157 زخمیوں کو اسپتال منتقل کیا گیا، جبکہ اب تک 13 افراد کی ہلاکت کی تصدیق ہو چکی ہے۔ 112 زخمی زیرِ علاج ہیں جن میں بعض کی حالت تشویشناک بتائی جا رہی ہے۔اسرائیلی ریسکیو سروسز کے مطابق ایران کی جانب سے تل ابیب پر کیے گئے تازہ میزائل حملے میں چھ افراد زخمی ہوئے۔ پولیس حکام نے بتایا کہ وسطی اسرائیل کے ایک درجن سے زائد مقامات پر میزائل یا اس کے ٹکڑے گرے، جن سے اندازہ ہوتا ہے کہ ایرانی بیلسٹک میزائل میں کلسٹر بم وارہیڈ نصب تھا۔دوسری جانب جنوبی لبنان میں لبنانی مزاحمتی تنظیم حزب اللہ کے حملے میں دو اسرائیلی فوجی ہلاک ہو گئے۔
