اسلام آباد(پاکستان خبر) اٹاوہ میں پاکستان اور کینیڈا کے درمیان سرمایہ کاری کے معاہدے پر مذاکرات کا آغاز ہو گیا ہے۔یہ مذاکرات مجوزہ فارن انویسٹمنٹ پروٹیکشن اینڈ پروموشن ایگریمنٹ (FIPPA) اور دو طرفہ سرمایہ کاری معاہدے سے متعلق ہیں، جن کا مقصد دونوں ممالک کے درمیان سرمایہ کاری کے نظام کو مضبوط بنانا ہے۔پاکستان کی جانب سے بورڈ آف انویسٹمنٹ کے ایڈیشنل سیکریٹری ذوالفقار علی وفد کی قیادت کر رہے ہیں، جبکہ وفد میں تجارت، سرمایہ کاری اور اقتصادی امور سے متعلق مختلف اداروں کے سینئر حکام بھی شامل ہیں۔کینیڈا میں تعینات پاکستان کے ہائی کمشنر محمد سلیم نے کہا کہ دونوں ممالک ایک مؤثر اور معیاری سرمایہ کاری نظام کے قیام کے لیے پرعزم ہیں۔ انہوں نے کہا کہ پاکستان نے کاروباری ماحول بہتر بنانے اور سرمایہ کاروں کے تحفظ کے لیے کئی اصلاحاتی اقدامات کیے ہیں۔افتتاحی اجلاس سے خطاب کرتے ہوئے گلوبل افیئرز کینیڈا کے جنوبی ایشیاء بیورو کے ڈائریکٹر جنرل جین کرسچین بریلانٹ نے پاکستانی وفد کا خیر مقدم کیا اور مذاکرات کو تعمیری اور نتیجہ خیز بنانے کی امید ظاہر کی۔واضح رہے کہ اس سے قبل مذاکرات کا پچھلا دور اکتوبر 2025 میں اسلام آباد میں منعقد ہوا تھا۔
