پاکستان اور چین کے درمیان راک سالٹ شعبے میں طویل المدتی تعاون کا معاہدہ

 اسلام آباد( کامرس ڈیسک)پاکستان کے معدنی شعبے میں بین الاقوامی تعاون کے فروغ کے لیے اہم پیش رفت سامنے آئی ہے، جہاں پاک سالٹ کارپوریشن اور چین نیشنل سالٹ انڈسٹری گروپ کے درمیان راک سالٹ کے شعبے میں طویل المدتی شراکت داری کا معاہدہ طے پا گیا ہے۔اس معاہدے میں ایس آئی ایف سی نے دونوں ممالک کے اداروں کو ایک پلیٹ فارم پر لانے میں کلیدی کردار ادا کیا، جبکہ وزارت توانائی (پیٹرولیم ڈویژن) نے بھی اس عمل میں معاونت فراہم کی۔معاہدے کے تحت کان کنی کا شعبہ، پراسیسنگ، ویلیو ایڈیشن اور تیار مصنوعات کی عالمی منڈیوں تک رسائی کے لیے مشترکہ اقدامات کیے جائیں گے۔اس شراکت داری کا مقصد پاکستان کے وسیع راک سالٹ ذخائر کو منظم عالمی سپلائی چین کا حصہ بنانا اور ملکی مصنوعات کی برآمدات میں اضافہ کرنا ہے۔ماہرین کے مطابق اس تعاون سے نہ صرف مقامی سطح پر صنعتی ترقی کو فروغ ملے گا بلکہ پاکستان کی معدنی برآمدات کو بھی عالمی منڈیوں میں نئی جگہ ملنے کی توقع ہے۔