پاکستان اور ایران کا اقتصادی تعاون بڑھانے پر اتفاق، تجارت 10 ارب ڈالر تک لے جانے کا ہدف

 اسلام آباد( کامرس ڈیسک)پاکستان اور ایران نے دوطرفہ اقتصادی تعاون اور سرحدی تجارت کے فروغ کے عزم کا اعادہ کرتے ہوئے باہمی تجارت کا حجم 10 ارب ڈالر تک بڑھانے پر اتفاق کیا ہے۔بورڈ آف انویسٹمنٹ کے اعلامیے کے مطابق پاکستان میں ایران کے سفیر رضا امیری مقدم نے وفاقی وزیر برائے سرمایہ کاری بورڈ قیصر احمد شیخ سے ملاقات کی، جس میں دوطرفہ اقتصادی تعلقات، سرمایہ کاری اور سرحدی تجارت کے مختلف پہلوؤں پر تفصیلی تبادلہ خیال کیا گیا۔ملاقات کے دوران وفاقی وزیر نے یقین دہانی کرائی کہ اقتصادی تعاون کی راہ میں حائل رکاوٹوں کو دور کرنے کے لیے متعلقہ اداروں کے ساتھ مکمل تعاون کیا جائے گا۔اعلامیے کے مطابق ایران نے پاکستان کو وسطی ایشیائی ریاستوں تک رسائی فراہم کرنے کی پیشکش بھی کی، جبکہ دونوں ممالک نے مشترکہ اقتصادی منصوبوں کو آگے بڑھانے پر اتفاق کیا۔فریقین نے سرحدی تجارت میں اضافے کے لیے مشترکہ اقدامات پر زور دیا اور روزانہ سرحد پار کرنے والے تجارتی ٹرکوں کی تعداد 2 ہزار تک بڑھانے کی تجویز پر بھی غور کیا گیا۔