پاکستان اور لبنان کے درمیان دفاعی تعاون بڑھانے پر اتفاق، عسکری قیادت کی اہم ملاقات

راولپنڈی (پاکستان خبر) چیف آف ڈیفنس فورسز فیلڈ مارشل سید عاصم منیر سے لبنانی آرمی چیف جنرل روڈولف ہیکل نے ملاقات کی، جس میں دوطرفہ دفاعی تعاون اور باہمی دلچسپی کے امور پر تفصیلی تبادلہ خیال کیا گیا۔آئی ایس پی آر کے مطابق لبنانی آرمی چیف کی جنرل ہیڈکوارٹرز آمد پر انہیں مسلح افواج کے چاق و چوبند دستے کی جانب سے گارڈ آف آنر پیش کیا گیا۔ملاقات کے دوران خطے میں امن و استحکام، عسکری تعاون کے فروغ، اور دونوں ممالک کی افواج کے درمیان پیشہ ورانہ روابط کو مزید مضبوط بنانے پر گفتگو ہوئی۔فیلڈ مارشل سید عاصم منیر نے لبنان کے ساتھ پاکستان کے دیرینہ اور دوستانہ تعلقات کو اہم قرار دیتے ہوئے دفاعی تعاون بڑھانے کے عزم کا اظہار کیا۔لبنانی آرمی چیف نے پاکستان کی مسلح افواج کی پیشہ ورانہ صلاحیتوں اور بین الاقوامی امن مشنز میں کردار کو سراہا۔دونوں رہنماؤں نے اس عزم کا اعادہ کیا کہ پاک لبنان عسکری تعلقات کو مزید وسعت دی جائے گی تاکہ علاقائی امن و استحکام کو فروغ مل سکے۔