پاکستان اور روس کے درمیان کھیلوں کے تعاون کو مزید فروغ دینے پر اتفاق

اسلام آباد(پاکستان خبر)وفاقی وزیر رانا ثناء اللہ سے پاکستان میں تعینات روسی سفیر البرٹ خوریف نے ملاقات کی، جس میں دونوں ممالک کے درمیان کھیلوں سمیت مختلف شعبوں میں دوطرفہ تعاون کے فروغ پر تبادلہ خیال کیا گیا۔ملاقات کے دوران اس بات پر اتفاق کیا گیا کہ پاکستان اور روس کے درمیان کھیلوں کے شعبے سے متعلق موجود مفاہمتی یادداشتوں پر عملدرآمد کو مزید تیز کیا جائے گا۔ اس موقع پر رانا ثناء اللہ نے کہا کہ دونوں ممالک کے درمیان بالخصوص فٹبال کے میدان میں تعاون کو ترجیحی بنیادوں پر آگے بڑھایا جائے گا۔وفاقی وزیر نے کہا کہ روس کے روایتی اور مقبول کھیلوں کے فروغ کے لیے بھی باہمی تعاون کو وسعت دی جائے گی۔ انہوں نے روس کو کھیلوں کے شعبے میں وسیع تجربے اور مضبوط صلاحیتوں کا حامل ملک قرار دیتے ہوئے کہا کہ تعلیم، ثقافت، معیشت اور کھیل دونوں ممالک کو ایک دوسرے کے مزید قریب لانے میں اہم کردار ادا کر سکتے ہیں۔روسی سفیر البرٹ خوریف نے اس موقع پر کہا کہ روس میں کرکٹ کے فروغ کے لیے پاکستان کے تجربات اور مہارت سے استفادہ کیا جائے گا۔ملاقات میں روسی سفیر نے امریکا اور ایران کے درمیان امن و استحکام کے لیے پاکستان کی سفارتی کوششوں کو بھی سراہا۔ ملاقات کے اختتام پر دونوں فریقوں نے اس عزم کا اظہار کیا کہ پاکستان اور روس کے درمیان مختلف شعبوں میں تعاون کے دائرہ کار کو مزید وسعت دینے کے لیے مشترکہ کوششیں جاری رکھی جائیں گی۔