پاکستان اور روس کے تعلقات نئے مرحلے میں داخل، مختلف شعبوں میں تعاون میں اضافہ

ماسکو ( کامرس ڈیسک) وفاقی وزیر توانائی (پاور ڈویژن) سردار اویس احمد خان لغاری نے کہا ہے کہ گزشتہ دو دہائیوں کے دوران پاکستان اور روس کے تعلقات میں نمایاں بہتری آئی ہے اور دونوں ممالک کے درمیان اعتماد، تجارت، توانائی، دفاع اور ٹیکنالوجی سمیت مختلف شعبوں میں تعاون مسلسل فروغ پا رہا ہے۔انہوں نے کہا کہ سوویت دور سے وابستہ پرانی بداعتمادی اب ختم ہو چکی ہے اور دونوں ممالک کے تعلقات ایک نئے اور مثبت دور میں داخل ہو چکے ہیں۔وفاقی وزیر کے مطابق حالیہ عرصے میں اعلیٰ قیادت کے درمیان روابط میں اضافہ ہوا ہے، جس کے تحت وزیراعظم پاکستان اور روسی صدر کے درمیان متعدد ملاقاتیں بھی ہو چکی ہیں۔انہوں نے بتایا کہ پاکستان اور روس کے درمیان بین الحکومتی کمیشن کے تحت توانائی سمیت مختلف شعبوں میں تعاون کو منظم انداز میں آگے بڑھایا جا رہا ہے، جبکہ دونوں ممالک کے درمیان سکیورٹی، انسداد دہشت گردی اور علاقائی تعاون پر بھی مشاورت جاری ہے۔سردار اویس لغاری نے علاقائی رابطہ کاری کو دوطرفہ تعلقات کا اہم ستون قرار دیتے ہوئے کہا کہ پاکستان بین الاقوامی شمال-جنوب ٹرانسپورٹ کوریڈور میں شمولیت کا خواہاں ہے، جو خطے میں تجارتی سرگرمیوں کو مزید فروغ دے سکتا ہے۔انہوں نے گوادر بندرگاہ کو اس راہداری سے منسلک کرنے کی تجویز کا خیرمقدم کرتے ہوئے کہا کہ یہ اقدام علاقائی اقتصادی تعاون اور عالمی رابطہ سازی کے لیے اہم پیش رفت ثابت ہو سکتا ہے۔