راولپنڈی( مانیٹرنگ ڈیسک) چیف آف ڈیفنس فورسز فیلڈ مارشل سید عاصم منیر سے شام کے وزیر خارجہ اسعد حسن الشیبانی نے وفد کے ہمراہ جی ایچ کیو میں ملاقات کی، جس میں دوطرفہ تعلقات اور علاقائی سکیورٹی صورتحال پر تبادلہ خیال کیا گیا۔ملاقات میں پاکستان اور شام کے درمیان دفاعی و سکیورٹی شعبوں میں تعاون اور روابط مزید بڑھانے پر اتفاق کیا گیا۔ فیلڈ مارشل عاصم منیر نے دونوں ممالک کے دیرینہ برادرانہ تعلقات اور مشترکہ سکیورٹی چیلنجز سے نمٹنے کیلئے باہمی تعاون کی اہمیت پر زور دیا۔شامی وزیر خارجہ نے علاقائی امن و استحکام کیلئے پاک فوج کے پیشہ ورانہ کردار کو سراہا۔ دونوں جانب سے دوطرفہ تعلقات مضبوط بنانے اور علاقائی امن کیلئے مشترکہ کوششیں جاری رکھنے کے عزم کا اعادہ بھی کیا گیا۔
