پاکستان اور ترکیہ کے درمیان توانائی تعاون کے فروغ کیلئے تین اہم معاہدوں پر دستخط

استنبول( کامرس ڈیسک) پاکستان اور ترکیہ کے درمیان توانائی کے شعبے میں تعاون کو مزید وسعت دینے کے لیے تین اہم مفاہمتی یادداشتوں پر دستخط کر دیے گئے۔یہ معاہدے استنبول میں ہونے والی اعلیٰ سطحی بین الوزارتی مشاورت کے دوران کیے گئے، جن کا مقصد توانائی کے شعبے میں ادارہ جاتی تعاون، تکنیکی مہارت کے تبادلے اور مشترکہ ترقیاتی اقدامات کو فروغ دینا ہے۔دستخط شدہ مفاہمتی یادداشتوں میں پاکستان کے انڈیپنڈنٹ سسٹم اینڈ مارکیٹ آپریٹر اور ترکیہ کے انرجی ایکسچینج ادارے کے درمیان معاہدہ، انڈیپنڈنٹ سسٹم اینڈ مارکیٹ آپریٹر اور ترکیہ کے ٹرانسمیشن سسٹم آپریٹر کے درمیان مفاہمت جبکہ پاور پلاننگ اینڈ مانیٹرنگ کمپنی اور ترک ادارے کے درمیان تعاون کا معاہدہ شامل ہے۔ان معاہدوں کے تحت نجکاری کے بعد گورننس فریم ورک، بجلی کی مارکیٹ کی ترقی، معاون خدمات کے ضوابط، پاور سسٹم آپریشنز، ٹرانسمیشن منصوبہ بندی، بجلی کی تقسیم اور ڈیجیٹلائزیشن کے شعبوں میں تعاون کو فروغ دیا جائے گا۔دونوں ممالک نے ادارہ جاتی استعداد کار بڑھانے، تکنیکی مہارت کے تبادلے اور جدید طریقہ کار سے استفادہ کرنے پر بھی اتفاق کیا ہے۔ اس کے تحت تربیتی پروگرام، مطالعاتی دورے، ماہرین کا تبادلہ اور مشترکہ تکنیکی منصوبے شامل ہوں گے۔وفاقی وزیر توانائی سردار اویس احمد خان لغاری نے ان مفاہمتی یادداشتوں کا خیر مقدم کرتے ہوئے کہا کہ یہ شراکت داریاں پاکستان کے توانائی اداروں کو مضبوط بنانے اور پاور سیکٹر میں اصلاحات کے عمل کو تیز کرنے میں اہم کردار ادا کریں گی۔ترک فریق نے بھی پاکستان کے ساتھ طویل المدتی ادارہ جاتی تعاون جاری رکھنے کے عزم کا اظہار کیا۔حکومت پاکستان نے ان معاہدوں کو دونوں ممالک کے درمیان توانائی مذاکرات کا اہم نتیجہ قرار دیتے ہوئے کہا ہے کہ یہ مفاہمتی یادداشتیں توانائی کے شعبے میں بڑھتی ہوئی اسٹریٹجک شراکت داری کی عکاس ہیں۔