راولپنڈی( پاکستان خبر)یوم استحصال کشمیر کے موقع پر فیلڈ مارشل عاصم منیر، نیول چیف ایڈمرل نوید اشرف، ایئر چیف مارشل ظہیر بابر سدھو اور افواج پاکستان نے مقبوضہ جموں و کشمیر کے عوام کے ساتھ یکجہتی کا اظہار کیا ہے۔پاک فوج کے شعبہ تعلقات عامہ (آئی ایس پی آر) کے مطابق مسلح افواج نے مقبوضہ کشمیر کے عوام کے ساتھ اپنی غیر متزلزل حمایت اور یکجہتی کا اعادہ کیا ہے۔آئی ایس پی آر کے بیان میں کہا گیا ہے کہ افواج پاکستان اقوام متحدہ کی سلامتی کونسل کی قراردادوں کے مطابق کشمیری عوام کے حق خودارادیت کی حمایت جاری رکھنے کے عزم پر قائم ہیں۔اعلامیے میں مقبوضہ جموں و کشمیر میں بھارتی اقدامات، فوجی پابندیوں، انسانی حقوق کی صورتحال اور خطے کی آبادیاتی تبدیلیوں سے متعلق تحفظات کا اظہار کیا گیا ہے۔آئی ایس پی آر کے مطابق اشتعال انگیز بیانات اور اقدامات خطے میں عدم استحکام کو بڑھا سکتے ہیں، جبکہ جنوبی ایشیا میں مستقل امن کا قیام مسئلہ کشمیر کے پرامن اور منصفانہ حل سے وابستہ ہے۔اعلامیے میں پاکستان کے عوام اور مسلح افواج کی جانب سے مقبوضہ کشمیر کے شہداء کو خراج عقیدت پیش کیا گیا، جبکہ اس عزم کا اظہار کیا گیا کہ کشمیری عوام کی جدوجہد کے حوالے سے پاکستان اپنی حمایت جاری رکھے گا۔
