اسلام آباد (پاکستان خبر) بحرین کے وزیر خارجہ ڈاکٹر عبداللطیف بن راشد الزیانی نائب وزیراعظم اسحاق ڈار کی دعوت پر دو روزہ سرکاری دورے پر آج پاکستان پہنچیں گے۔دورے کے دوران پاک بحرین تعلقات اور مختلف شعبوں میں دوطرفہ تعاون بڑھانے پر بات چیت ہوگی۔ اسحاق ڈار اور بحرینی وزیر خارجہ مشترکہ وزارتی کمیشن کے تیسرے اجلاس کی مشترکہ صدارت کریں گے، جس میں دونوں ممالک کے تعلقات کے مختلف پہلوؤں کا جائزہ لیا جائے گا۔اجلاس میں تجارت، سرمایہ کاری، اقتصادی تعاون، دفاع و سلامتی، افرادی قوت اور ثقافتی روابط سمیت دیگر شعبوں میں تعاون مزید مستحکم کرنے پر غور ہوگا۔ فریقین باہمی دلچسپی کے علاقائی و عالمی معاملات اور کثیرالجہتی فورمز پر تعاون کے فروغ پر بھی تبادلہ خیال کریں گے۔ترجمان دفتر خارجہ کے مطابق پاکستان اور بحرین کے درمیان مشترکہ عقائد، اقدار، باہمی احترام اور دیرینہ عوامی روابط پر مبنی برادرانہ تعلقات قائم ہیں۔ بحرینی وزیر خارجہ کا دورہ دونوں ملکوں کے تعلقات اور باہمی تعاون کو مزید مضبوط بنانے کے عزم کی عکاسی کرتا ہے۔
