اسلام آباد( پاکستان خبر)پاکستانی فضائیہ کے سربراہ ائیر چیف مارشل ظہیر احمد بابر سدھو کے دورۂ بیلاروس کے بعد دونوں ممالک نے دفاعی تعاون کو مزید وسعت دینے پر اتفاق کیا ہے۔دورے کے دوران 2025 تا 2027 کے روڈ میپ کے تحت مشترکہ دفاعی پیداوار، ٹیکنالوجی کی منتقلی اور عسکری تعاون کے فروغ پر تبادلہ خیال کیا گیا۔ مجوزہ تعاون میں جدید ڈرونز، مائیکرو الیکٹرانکس، آپٹرونکس اور بھاری فوجی گاڑیوں سمیت مختلف شعبے شامل ہیں۔پاکستان کی جانب سے بیلاروسی فضائیہ کے اہلکاروں کو بنیادی اور ٹیکٹیکل سطح کی پائلٹ ٹریننگ فراہم کرنے کی تجویز بھی زیر غور آئی۔دفاعی تجزیہ کار ریئر ایڈمرل (ر) فیصل شاہ کے مطابق شنگھائی تعاون تنظیم (SCO) کی مکمل رکنیت کے بعد پاکستان اور بیلاروس کے تعلقات صرف سفارتی سطح تک محدود نہیں رہے بلکہ صنعتی اور دفاعی شعبوں تک پھیل رہے ہیں۔ان کے مطابق یہ پیش رفت مستقبل میں پاکستان، بیلاروس اور روس کے درمیان وسیع تر دفاعی تعاون کی بنیاد بن سکتی ہے۔
