مقبوضہ کشمیر سمیت تمام تصفیہ طلب مسائل پر مذاکرات ہونے چاہئیں، طاہر اندرابی

نیویارک (پاکستان خبر) پاکستان نے اقوام متحدہ سے خطے میں اسلحے کی دوڑ روکنے کا مطالبہ کرتے ہوئے کہا ہے کہ مقبوضہ جموں و کشمیر سمیت تمام تصفیہ طلب مسائل کا حل مذاکرات کے ذریعے نکالا جانا چاہیے۔اقوام متحدہ کی جنرل اسمبلی میں پاکستان کے مستقل مندوب طاہر اندرابی نے کہا کہ دنیا میں جنگوں کا دائرہ وسیع ہو رہا ہے، بین الاقوامی قانون کی عمل داری کمزور پڑ رہی ہے اور تحمل و برداشت کا راستہ ترک کیا جا رہا ہے۔انہوں نے مشرق وسطیٰ میں کشیدگی کم کرنے کی ضرورت پر زور دیتے ہوئے کہا کہ ایران اور امریکا کے درمیان ثالثی کے نتیجے میں جنگ بندی اور اسلام آباد مفاہمتی یادداشت کی صورت میں پیش رفت ہوئی۔طاہر اندرابی نے کہا کہ سعودی عرب اور ترکیہ کے ساتھ مکہ دفاعی معاہدہ دفاعی نوعیت کا ہے اور اقوام متحدہ کے منشور سے مطابقت رکھتا ہے۔پاکستانی مندوب کے مطابق بھارت کے جارحانہ عسکری نظریات اور بڑے پیمانے پر فوجی توسیع کے باعث جنوبی ایشیا عدم استحکام اور دباؤ کا شکار ہے۔انہوں نے واضح کیا کہ پاکستان اسلحے کی دوڑ میں شامل نہیں ہونا چاہتا، تاہم اپنی ضروریات کے مطابق دفاعی صلاحیتیں برقرار رکھے گا۔ ان کا کہنا تھا کہ جوہری صلاحیتوں کی موجودگی میں یہ سمجھنا غلط ہے کہ جنگ کو قابو میں رکھا جا سکتا ہے۔طاہر اندرابی نے ایک بار پھر زور دیا کہ مقبوضہ جموں و کشمیر سمیت تمام تصفیہ طلب مسائل کا پُرامن حل مذاکرات کے ذریعے تلاش کیا جانا چاہیے۔