ایران امریکا ثالثی میں پاکستان محتاط انداز میں پرامید ہے، ڈی جی آئی ایس پی آر

اسلام آباد (پاکستان خبر) پاک فوج کے شعبہ تعلقات عامہ کے ڈائریکٹر جنرل لیفٹیننٹ جنرل احمد شریف چوہدری نے کہا ہے کہ پاکستان ایران اور امریکا کے درمیان ثالثی کے کردار کے حوالے سے محتاط انداز میں پرامید ہے۔خبر رساں ادارے رائٹرز کو انٹرویو دیتے ہوئے ڈی جی آئی ایس پی آر نے فیلڈ مارشل عاصم منیر کے ایران کے حالیہ دو دوروں کو مثبت قرار دیا۔ ان کا کہنا تھا کہ اگر یہ دورے مثبت نہ ہوتے تو فیلڈ مارشل دو مرتبہ ایران کیوں جاتے؟ تاہم انہوں نے امید کے ساتھ احتیاط برتنے پر زور دیا۔انہوں نے کسی کا نام لیے بغیر کہا کہ اب بھی بعض طاقتور عناصر تنازع کو طول دینے اور رکاوٹیں ڈالنے میں مصروف ہیں، کیونکہ ان کے خیال میں یہ کشیدگی ان کے مفاد میں ہے۔ احمد شریف چوہدری نے ایران کے ساتھ ہونے والی بات چیت اور امریکا کی حمایت سے متعلق سوالات پر تبصرہ کرنے سے گریز کیا۔ڈی جی آئی ایس پی آر نے مکہ دفاعی معاہدے میں ایران کی شمولیت کے امکان پر کہا کہ معاہدے کا متن کسی نئے رکن کو شامل ہونے سے نہیں روکتا۔ مشترکہ دفاع اور علاقائی امن کے وژن سے اتفاق کرنے والے ہر ملک کا خیرمقدم ہے، تاہم اس حوالے سے فیصلہ تینوں بنیادی فریقوں کی سیاسی قیادت کرے گی۔پاکستان، سعودی عرب اور ترکیہ کے درمیان مکہ مشترکہ دفاعی معاہدے پر رواں سال 7 اگست کو دستخط ہوئے تھے، جس کے تحت تینوں ممالک میں سے کسی ایک پر حملے کو تینوں پر حملہ تصور کیا جائے گا۔سعودی عرب میں مزید پاکستانی فوجیوں کی تعیناتی سے متعلق سوال پر لیفٹیننٹ جنرل احمد شریف چوہدری نے کہا کہ اس کا انحصار حالات اور دونوں ممالک کی سیاسی قیادت کے فیصلے پر ہوگا۔ انہوں نے کہا کہ پاکستان سعودی عرب اور مکہ و مدینہ کے مقدس مقامات کے دفاع کے لیے پرعزم ہے، تاہم پاکستان یمن کے اندرونی تنازع کا حصہ نہیں ہے۔خیبرپختونخوا میں گورنر راج اور ایمرجنسی کے بعد بڑے فوجی آپریشن کے امکان سے متعلق سوال پر ڈی جی آئی ایس پی آر نے کہا کہ فوج انسداد دہشت گردی کی کارروائیاں اس انداز میں نہیں کرتی۔ ان کے مطابق دہشت گردوں کے خلاف انٹیلی جنس بیسڈ آپریشنز کیے جاتے ہیں اور ان کارروائیوں کی رفتار مزید بڑھائی جائے گی۔واضح رہے کہ وفاقی حکومت نے 11 اکتوبر 2026 کو خیبرپختونخوا میں گورنر راج اور ایمرجنسی نافذ کی تھی۔ حکومت نے صوبائی انتظامیہ پر دہشت گردی روکنے میں ناکامی اور وفاق سے تعاون نہ کرنے کا الزام عائد کیا تھا، جبکہ پی ٹی آئی نے ان الزامات کو مسترد کیا تھا۔