کیلیفورنیا( ویب ڈیسک) چینی سائنس دانوں نے نظامِ شمسی سے باہر 3 ایسے سیارے دریافت کیے ہیں جو اپنے میزبان ستاروں کے ریڈ جائنٹ بننے کے باوجود تباہی سے بچ گئے، حالانکہ موجودہ سائنسی نظریات کے مطابق انہیں ستاروں میں ضم ہو جانا چاہیے تھا۔یہ دریافت چین کی یونیورسٹی آف یوننان کے پروفیسر چیان شینگ بانگ کی سربراہی میں کام کرنے والی تحقیقی ٹیم نے کی۔ تحقیق میں 24Boo، HD12648 اور TYC4282-605-1 نامی 3 سیاروں کا جائزہ لیا گیا۔ماہرین کے مطابق جب کسی ستارے کے مرکز میں ہائیڈروجن ختم ہو جاتی ہے تو وہ پھیل کر ریڈ جائنٹ بن جاتا ہے اور اس کا حجم لاکھوں گنا بڑھ سکتا ہے۔ اس دوران قریبی سیارے ستارے میں نگل لیے جاتے ہیں یا اس کی کششِ ثقل کے باعث تباہ ہو جاتے ہیں۔تاہم دریافت ہونے والے تینوں سیارے خطرے کے علاقے میں ہونے کے باوجود آج بھی اپنے مدار میں موجود ہیں۔ محققین نے میزبان ستاروں کی روشنی میں معمولی تبدیلیوں کا تجزیہ کرکے ان کی ارتقائی کیفیت کی تصدیق کی۔پروفیسر چیان شینگ بانگ کے مطابق بیک وقت 3 ایسے سیاروں کی دریافت محض اتفاق نہیں بلکہ کسی مشترکہ طبعی عمل کی نشاندہی کرتی ہے۔ اس تحقیق سے سیاروں اور ستاروں کے ارتقا سے متعلق موجودہ سائنسی نظریات پر مزید تحقیق کے نئے امکانات پیدا ہوئے ہیں۔
