امریکا ایران جنگ میں نئی شدت زیادہ تباہ کن ہوسکتی ہے، مصر کی وارننگ

قاہرہ ( مانیٹرنگ ڈیسک) مصر کے وزیر خارجہ بدر عبدالعاطی نے خبردار کیا ہے کہ امریکا اور ایران کے درمیان جنگ میں دوبارہ شدت آنے کے نتائج پہلے سے زیادہ تباہ کن ہوسکتے ہیں اور پورا خطہ اس کے سنگین اثرات کی زد میں آسکتا ہے۔خبر رساں ادارے رائٹرز کے مطابق بدر عبدالعاطی نے بحرین میں انٹرنیشنل انسٹی ٹیوٹ فار اسٹریٹجک اسٹڈیز کے منامہ ڈائیلاگ سکیورٹی سمٹ سے خطاب کرتے ہوئے کہا کہ وہ جنگ میں کشیدگی کے ایک نئے دور کے امکان پر انتہائی فکرمند ہیں۔مصری وزیر خارجہ کا کہنا تھا کہ اگر امریکا اور ایران کے درمیان دوبارہ فوجی تصادم شدت اختیار کرتا ہے تو اس کے اثرات وسیع اور انتہائی تباہ کن ہوسکتے ہیں۔ان کا یہ بیان ایسے وقت میں سامنے آیا ہے جب دونوں ممالک کے درمیان کشیدگی اور سفارتی کوششیں مشرق وسطیٰ کی صورتحال پر اثرانداز ہو رہی ہیں۔خطے کے ممالک کو خدشہ ہے کہ لڑائی میں دوبارہ شدت آنے سے سلامتی، معیشت، توانائی کی ترسیل اور علاقائی استحکام متاثر ہوسکتا ہے۔ بدر عبدالعاطی نے کسی ممکنہ نئی کارروائی کی تفصیلات نہیں بتائیں بلکہ جنگ کے مزید پھیلاؤ کے تباہ کن نتائج پر تشویش کا اظہار کیا۔