پاکستان چین مشترکہ سرحدی کمیشن فعال، پہلا اجلاس اسلام آباد میں انعقاد

اسلام آباد ( پاکستا ن خبر) پاکستان اور چین نے مشترکہ سرحدی کمیشن باقاعدہ طور پر فعال کردیا، جس کا پہلا اجلاس اسلام آباد میں وزارتِ خارجہ میں منعقد ہوا۔اجلاس کی مشترکہ صدارت چین کی وزارتِ خارجہ کے محکمہ سرحدی و سمندری امور کے نائب ڈائریکٹر جنرل لی یا اور پاکستان کے دفترِ خارجہ میں چین امور کے ڈائریکٹر جنرل بلال محمود چودھری نے کی۔دفترِ خارجہ کے مطابق کمیشن سرحدی انتظام، تجارت، مشترکہ سروے اور عوامی روابط کے فروغ کیلئے رابطہ کاری کا پلیٹ فارم فراہم کرے گا۔ یہ کمیشن 2013ء میں پاکستان اور چین کے درمیان طے پانے والے سرحدی انتظام کے معاہدے کے تحت قائم کیا گیا تھا، جسے اب عملی طور پر فعال کردیا گیا ہے۔کمیشن کے ذریعے سرحدی نشانات کی دیکھ بھال، سرحد پار سہولیات کے انتظام، مشترکہ جائزوں اور دیگر عملی معاملات پر تعاون کیا جائے گا۔حکام کے مطابق اس اقدام سے خنجراب گزرگاہ کے ذریعے آمدورفت اور تجارت سمیت چین پاکستان اقتصادی راہداری سے متعلق امور میں باہمی تعاون مزید مستحکم ہوگا۔پاکستان اور چین کے مطابق نیا کمیشن کسی سرحدی تنازع کے حل کیلئے نہیں بلکہ پہلے سے متعین مشترکہ سرحد کے انتظام اور عملی معاملات کو بہتر انداز میں نمٹانے کیلئے قائم کیا گیا ہے۔