اسلام آباد( پاکستان خبر) پاکستان میں غیر ملکیوں کی جانب سے مبینہ سائبر فراڈ اور فحش مواد کے عالمی نیٹ ورک کے انکشاف کے بعد وفاقی حکومت نے غیر قانونی کال سینٹرز کے خلاف ملک گیر کارروائی کا فیصلہ کرلیا۔ذرائع کے مطابق ایف آئی اے ہیڈکوارٹر کے ماتحت خصوصی ٹاسک فورس تشکیل دی جائے گی، جو بھتہ خوری، بلیک میلنگ، جوا اور آن لائن فراڈ سمیت مختلف جرائم کی تحقیقات کرے گی۔ کارروائیوں کی روزانہ رپورٹ وزارت داخلہ کو پیش کی جائے گی۔ذرائع کا کہنا ہے کہ کراچی میں موجود کال سینٹرز کی فہرست بھی تیار کرلی گئی ہے، جبکہ تمام متعلقہ اداروں کو ٹاسک فورس سے مکمل تعاون کی ہدایت کی گئی ہے۔واضح رہے کہ چند روز قبل اسلام آباد میں ایک غیر قانونی کال سینٹر پر کارروائی کے دوران 284 غیر ملکی شہریوں کو گرفتار کیا گیا تھا۔
