پاکستان فٹبال فیڈریشن کے صدر نے الاؤنس سے نوجوان کھلاڑی کی حوصلہ افزائی کی

لاہور( سپورٹس ڈیسک)پاکستان فٹبال فیڈریشن کے صدر سید محسن گیلانی نے کھلاڑیوں کی حوصلہ افزائی کے لیے ایک منفرد اقدام کیا ہے اور اپنے الاؤنسز ابھرتے ہوئے باصلاحیت کھلاڑیوں کو دینے کا اعلان کیا ہے۔گزشتہ روز کانگریس اجلاس میں شرکت کے لیے حاصل ہونے والا اپنا الاؤنس سید محسن گیلانی نے پاکستان انڈر 20 ٹیم کے کھلاڑی محمد عبداللہ کو دے دیا۔ یہ اعزاز انہوں نے اسلام آباد میں جاری ساف انڈر 20 فٹبال چیمپین شپ کی تیاری کے دوران محمد عبداللہ کی حوصلہ افزائی کے لیے دیا۔واضح رہے کہ محمد عبداللہ نے ساف انڈر 17 چیمپین شپ میں پاکستان کے لیے شاندار کارکردگی کا مظاہرہ کرتے ہوئے چھ گول کر کے ٹاپ اسکورر کا اعزاز حاصل کیا تھا، جس کی بنیاد پر انہیں یہ اعزاز دیا گیا۔