پاکستان اور کینیا کی باہمی تجارت 1 ارب ڈالر سے تجاوز، تاریخی سنگِ میل حاصل

اسلام آباد( کامرس ڈیسک) مالی سال 2025-2026 کے دوران پاکستان اور کینیا کے درمیان باہمی تجارت کا حجم تاریخ میں پہلی بار 1 ارب 2 کروڑ 30 لاکھ ڈالر تک پہنچ گیا ہے۔پاک کینیا بزنس کونسل کے صدر رفیق سلیمان کے مطابق یہ سنگ میل دونوں ممالک کے درمیان بڑھتے ہوئے اقتصادی تعاون کی واضح علامت ہے۔ ان کا کہنا تھا کہ یہ پیش رفت کئی برس کی مسلسل کوششوں اور کاروباری روابط کے فروغ کا نتیجہ ہے۔انہوں نے بتایا کہ کینیا کو پاکستان سے ہوزری، گارمنٹس، ادویات اور دیگر ویلیو ایڈڈ مصنوعات کی برآمدات میں نمایاں اضافہ ہوا ہے، جبکہ کینیا سے پاکستان کو چائے کی درآمدات بھی بڑھ رہی ہیں۔رفیق سلیمان کے مطابق چند سال قبل پاکستان اور کینیا کی دوطرفہ تجارت کو 1 ارب ڈالر تک پہنچانا محض ایک خواب تھا، تاہم پاک کینیا بزنس کونسل کی کوششوں، متعلقہ اداروں کے تعاون اور تجارتی سرگرمیوں کے فروغ سے یہ ہدف اب حقیقت بن چکا ہے۔انہوں نے مزید کہا کہ اس تاریخی کامیابی کی خوشی میں جلد نیروبی اور پاکستان میں تقریبات منعقد کی جائیں گی، جن میں دونوں ممالک کے سفارتی اور تجارتی نمائندے شرکت کریں گے۔اس موقع پر پاکستان میں کینیا کے ہائی کمشنر اور کمرشل سیکشن کے نمائندوں کی کوششوں کو بھی سراہا جائے گا، جبکہ نیروبی میں پاکستانی ہائی کمیشن اور کمرشل ونگ کی خدمات کو بھی خراجِ تحسین پیش کیا جائے گا۔رفیق سلیمان نے کہا کہ ایک ارب ڈالر کی سطح عبور کرنا اختتام نہیں بلکہ ایک نئے اقتصادی باب کا آغاز ہے، اور مستقبل میں باہمی تعاون کے ذریعے دونوں ممالک تجارت، سرمایہ کاری اور صنعتی شراکت داری کو مزید وسعت دے سکتے ہیں۔