پاکستان، کویت پروٹوکول معاہدہ، دفاعی تعاون مزید مضبوط بنانے پر اتفاق

اسلام آباد( پاکستان خبر) پاکستان اور کویت کے درمیان پروٹوکول معاہدہ 2026 دونوں ممالک کے دیرینہ برادرانہ تعلقات اور دفاعی تعاون کو مزید مضبوط بنانے کی عکاسی کرتا ہے۔معاہدہ 2023 میں ہونے والے دفاعی تعاون کے معاہدے کی بنیاد پر تشکیل دیا گیا، جس کی 2026 میں کویت نے توثیق کی۔ اس کا مقصد دفاعی روابط کو ادارہ جاتی اور عملی تعاون میں تبدیل کرنا ہے۔پروٹوکول کے تحت دونوں ممالک کے درمیان فوجی روابط، دفاعی تعاون، فوجی تربیت اور تعیناتی کے شعبوں میں تعاون کو وسعت دینے کے لیے باقاعدہ فریم ورک فراہم کیا گیا ہے۔معاہدے کے مطابق یہ پروٹوکول کسی دوسرے دوطرفہ یا کثیرالجہتی معاہدے سے منسلک نہیں بلکہ پاکستان اور کویت کے باہمی دفاعی تعلقات کے دائرہ کار تک محدود ہے۔ اسے دونوں ممالک کی دیرینہ دفاعی شراکت داری کو مزید مستحکم کرنے کی جانب اہم پیش رفت قرار دیا جا رہا ہے۔