اسلام آباد( ویب ڈیسک) سپارکو نے پاکستان کے پہلے قمری روور کا سرکاری نام ’’جناح-1‘‘ رکھنے کا اعلان کردیا۔سپارکو کے مطابق یہ نام ملک گیر مقابلے کے دوران موصول ہونے والی 4 ہزار سے زائد تجاویز میں سے منتخب کیا گیا، جبکہ ’’جناح-1‘‘ نام 7 شرکاء نے تجویز کیا تھا۔ قرعہ اندازی کے ذریعے بہاول نگر سے تعلق رکھنے والے 17 سالہ طیب کریم کو فاتح قرار دیا گیا۔تقریب سے خطاب کرتے ہوئے چیئرمین سپارکو نے کہا کہ ’’جناح-1‘‘ کا نام بانیٔ پاکستان قائداعظم محمد علی جناح کو خراج عقیدت پیش کرتا ہے، جبکہ یہ پاکستان کے عزم، ترقی اور نئے خلائی افق کی علامت بھی ہے۔سپارکو کے مطابق پاکستان کا پہلا قمری روور 2029 میں چین کے چانگ ای-8 مشن کے ذریعے چاند پر بھیجا جائے گا، جہاں ’’جناح-1‘‘ چاند کے جنوبی قطب پر سائنسی تحقیق کرے گا۔پاکستانی ساختہ قمری روور چاند کی سطح پر پلازما، تابکاری اور سطحی جغرافیہ کا مطالعہ کرے گا، جبکہ مستقبل میں قمری تحقیق اور چاند پر انسانی موجودگی سے متعلق اہم تجربات میں بھی معاونت کرے گا۔سپارکو کا کہنا ہے کہ ’’جناح-1‘‘ پاکستان کے خلائی تحقیق کے سفر میں اہم سنگ میل ثابت ہوگا اور سائنسی و تکنیکی شعبوں میں نئی راہیں کھولنے میں مدد دے گا۔
