اسلام آباد( پاکستان خبر)صدرِ مملکت آصف علی زرداری نے دہشت گردی کے متاثرین کو خراجِ عقیدت پیش کرتے ہوئے کہا ہے کہ پاکستان نے دہشت گردی کے خلاف جنگ میں بے پناہ قربانیاں دی ہیں۔عالمی یومِ یادِ متاثرینِ دہشت گردی کے موقع پر صدر مملکت نے کہا کہ دہشت گردی کے زخم قومی یادداشت کا حصہ بن چکے ہیں، جبکہ خیبر پختونخوا اور بلوچستان میں قربانیوں کا سلسلہ بدستور جاری ہے۔انہوں نے کہا کہ دہشت گردی کی بلاامتیاز مذمت اور کسی بھی ملک کے خلاف کارروائی کیلئے کسی علاقے کو استعمال ہونے سے روکنا ضروری ہے۔ نوجوانوں کو انتہا پسندی سے محفوظ رکھنا ہوگا، دہشت گرد قومی عزم کو شکست دینے میں ناکام رہے ہیں۔صدر زرداری نے کہا کہ پرامن اور مضبوط پاکستان ہمارا عزم ہے اور دعا کی کہ اللہ تعالیٰ ملک کو دائمی امن و خوشحالی عطا فرمائے۔
