اسلام آباد (کامرس ڈیسک) وفاقی وزیرِ بحری امور جنید انوار چوہدری نے کہا ہے کہ عالمی سطح پر تقریباً 900 بندرگاہوں کی درجہ بندی میں پاکستان 34ویں پوزیشن پر آگیا ہے، جبکہ کراچی پورٹ کی عالمی بحری رابطہ کاری میں بھی نمایاں بہتری ریکارڈ ہوئی ہے۔ایک بیان میں جنید انوار چوہدری نے بتایا کہ کراچی پورٹ کا پورٹ لائنر شپنگ کنیکٹیویٹی انڈیکس اسکور بڑھ کر 343 ہوگیا ہے، جو عالمی تجارت کے ساتھ مضبوط روابط کی نشاندہی کرتا ہے۔انہوں نے کہا کہ پورٹ لائنر شپنگ کنیکٹیویٹی انڈیکس دنیا بھر کی تقریباً 900 بندرگاہوں سے حاصل ہونے والے اعداد و شمار کی بنیاد پر مرتب کیا جاتا ہے، جس کے مطابق پاکستان عالمی درجہ بندی میں 34ویں نمبر پر پہنچ گیا ہے۔
