پاکستان کا بھارتی بیان مسترد، افغانستان میں کارروائیوں سے متعلق الزامات کو بے بنیاد قرار دے دیا

اسلام آباد( پاکستان خبر) پاکستان نے افغانستان میں دہشت گردوں کے خلاف کارروائی سے متعلق بھارتی وزارت خارجہ کے بیان کو من گھڑت اور بے بنیاد قرار دیتے ہوئے سختی سے مسترد کر دیا ہے۔ترجمان دفتر خارجہ طاہر اندرابی نے کہا کہ بھارت کی جانب سے دیا گیا بیان حقائق کے منافی ہے اور پاکستان افغانستان میں دہشت گردوں کے بنیادی ڈھانچے کے خلاف اپنی جائز کارروائیاں کر رہا ہے۔انہوں نے کہا کہ بھارت مقبوضہ جموں و کشمیر میں کشمیری عوام کے حقِ خودارادیت کو مسلسل دبا رہا ہے، جبکہ افغان سرزمین سے پاکستان کے خلاف سرگرم دہشت گرد گروہوں کی سرپرستی بھی کر رہا ہے۔ ان کے مطابق بھارت خود افغانستان کی سرزمین کو پاکستان کے خلاف استعمال کرتا ہے۔دفتر خارجہ نے کہا کہ بھارت اقوام متحدہ کی سلامتی کونسل کی پابندیوں کی خلاف ورزی کرتے ہوئے خطے میں امن و استحکام کو نقصان پہنچا رہا ہے، لہٰذا اس کے بے بنیاد الزامات اور اشتعال انگیز بیانات کو عالمی سطح پر اہمیت نہیں دی جانی چاہیے۔ترجمان نے مزید کہا کہ ایک ایسا ملک جو ہمسایہ ممالک کے اندرونی معاملات میں مداخلت کرتا ہو، اس کی جانب سے ایسے بیانات مضحکہ خیز ہیں۔دفتر خارجہ نے اس عزم کا اعادہ کیا کہ پاکستان اپنے شہریوں کی سلامتی اور تحفظ کے لیے بین الاقوامی قوانین کے تحت ہر ضروری اقدام کرتا رہے گا۔