پاکستان میں توانائی اور معدنیات کے شعبوں میں سرمایہ کاری بڑھانے پر اتفاق

اسلام آباد( کامرس ڈیسک) وفاقی وزیرِ پیٹرولیم علی پرویز ملک سے بین الاقوامی توانائی کمپنیوں کے نمائندوں نے الگ الگ ملاقاتیں کیں، جن میں پاکستان کے توانائی اور اہم معدنیات کے شعبوں میں سرمایہ کاری کے فروغ پر تبادلہ خیال کیا گیا۔وفاقی وزیر نے امریکی کمپنی مورگن ہیوز انرجی کے صدر گریگوری بلوم اور تیجارہ کیپیٹل کے چیف ایگزیکٹو احمد ولید سے ملاقات کی۔ اعلامیے کے مطابق دونوں کمپنیاں بلوچستان میں معدنیات سے متعلق منصوبوں پر مشترکہ طور پر کام کر رہی ہیں۔ملاقات کے دوران گریگوری بلوم نے پاکستان کے موجودہ تیل و گیس ذخائر سے پیداوار بڑھانے کے لیے سرمایہ کاری میں دلچسپی کا اظہار کیا، جس پر علی پرویز ملک نے مقامی توانائی پیداوار میں اضافے اور غیر ملکی سرمایہ کاری کے فروغ کے لیے حکومتی تعاون کی یقین دہانی کرائی۔وفاقی وزیرِ پیٹرولیم نے ویٹول ایشیا کے چیف ایگزیکٹو کیرن گالاگر سے بھی ملاقات کی، جس میں گوادر میں کمپنی کے بنکرنگ آپریشنز کے کامیاب آغاز پر انہیں مبارکباد دی گئی۔ملاقات میں ہائی سلفر فیول آئل کو کم سلفر والے ایندھن میں تبدیل کرنے کے منصوبے، نئی بانڈڈ اسٹوریج پالیسی کے تحت سرمایہ کاری کے مواقع اور عالمی توانائی کمپنیوں کے ساتھ تعاون بڑھانے کے امور پر بھی تفصیلی گفتگو کی گئی۔حکومت کا کہنا ہے کہ پاکستان توانائی اور معدنیات کے شعبوں میں غیر ملکی سرمایہ کاری کے لیے سازگار ماحول فراہم کرنے کے لیے اقدامات جاری رکھے ہوئے ہے۔