مالدیپ ( سپورٹس ڈیسک) مالے میں ہونے والے چار ملکی فٹبال ٹورنامنٹ کے لیے پاکستان قومی فٹبال ٹیم کا اعلان کر دیا گیا ہے۔قومی ٹیم کے ہیڈ کوچ نولبرٹو سولانو نے سوشل میڈیا پر ویڈیو پیغام کے ذریعے 23 رکنی اسکواڈ کا اعلان کیا۔ ٹیم میں دو نئے کھلاڑی پہلی مرتبہ شامل کیے گئے ہیں۔نئے شامل ہونے والے کھلاڑیوں میں فارورڈ علی خان اور مڈفیلڈر عادل نبی شامل ہیں، جو بالترتیب سویڈن اور برطانیہ میں کلب فٹبال کھیلتے ہیں۔ٹیم میں تین گول کیپر شامل کیے گئے ہیں جن میں ثاقب حنیف، یوسف بٹ اور حسن علی شامل ہیں۔ دفاعی کھلاڑیوں میں عبداللہ اقبال، محمد فضل، عبداللہ شاہ، عیسیٰ سلیمان اور دیگر کھلاڑی شامل ہیں۔اسی طرح مڈفیلڈ لائن میں عادل نبی، راہس نبی، عالمگیر غازی، حیان خٹک، اوٹس خان اور علی آغا کو شامل کیا گیا ہے، جبکہ فارورڈ لائن میں شائق دوست، عمر نواز، علی خان، ہارون حامد، علی شاہ اور صمد ارشد ٹیم کا حصہ ہیں۔یہ ٹورنامنٹ یکم جون سے 10 جون تک کھیلا جائے گا جس میں پاکستان کے علاوہ میزبان مالدیپ، بنگلہ دیش اور افغانستان کی ٹیمیں بھی شریک ہوں گی۔
