اسلام آباد( پاکستا ن خبر) پاکستان نے شام میں اسرائیلی حملوں کی شدید مذمت کرتے ہوئے عالمی برادری سے اسرائیل کو عالمی قوانین کی خلاف ورزیوں پر جوابدہ ٹھہرانے اور خطے میں بڑھتی کشیدگی روکنے کے لیے مؤثر کردار ادا کرنے کا مطالبہ کیا ہے۔ترجمان دفتر خارجہ کے مطابق پاکستان شام کے خلاف اسرائیلی حملوں کو مسترد کرتا ہے اور ادلب کے ابو الظہور فضائی اڈے پر اسرائیلی قابض افواج کے بلااشتعال حملے کو عالمی قانون کی کھلی خلاف ورزی قرار دیتا ہے۔ترجمان نے کہا کہ اسرائیل کی اشتعال انگیز کارروائیاں خطے کے امن اور استحکام کو مزید نقصان پہنچا سکتی ہیں۔ پاکستان شامی عوام کے ساتھ بھرپور یکجہتی کا اظہار کرتے ہوئے شام کی خودمختاری، علاقائی سالمیت، امن اور خوشحالی کے لیے اپنی حمایت کا اعادہ کرتا ہے۔دفتر خارجہ کے مطابق عالمی برادری اسرائیلی قابض افواج کی عالمی قوانین کی مسلسل خلاف ورزیوں کے خاتمے کے لیے اپنا کردار ادا کرے اور خطے کو عدم استحکام سے دوچار کرنے والی کارروائیوں پر اسرائیل کا احتساب یقینی بنائے۔ترجمان نے کہا کہ پاکستان خطے میں پائیدار امن اور استحکام کے لیے شام کی خودمختاری اور علاقائی سالمیت کے تحفظ کا حامی ہے۔
