اسلام آباد( کامرس ڈیسک) پیٹرولیم ڈویژن نے یکم جولائی 2027 سے ملک بھر میں گیس کا یکساں ٹیرف نافذ کرنے کا حتمی فیصلہ کرلیا ہے، جس کی باقاعدہ منظوری عالمی مالیاتی فنڈ (آئی ایم ایف) سے لی جائے گی۔نجی ٹی وی کی رپورٹ کے مطابق حکومت موجودہ کراس سبسڈی کا نظام ختم کرنے کی تیاری کر رہی ہے۔ اس تبدیلی کے اثرات کم کرنے اور کم آمدن والے گھرانوں کو ہدفی مالی معاونت فراہم کرنے کیلئے 162 ارب روپے مختص کیے جائیں گے۔مجوزہ اصلاحات کے تحت پاکستان میں رائج گیس کا 12 سلیب پر مشتمل ٹیرف نظام ختم ہوجائے گا، جس میں صارفین اپنی ماہانہ کھپت کے حساب سے مختلف نرخ ادا کرتے ہیں۔نئے نظام کے تحت تمام صارفین کو 1,708 روپے فی ایم ایم بی ٹی یو کے یکساں اوسط ٹیرف پر منتقل کیا جائے گا۔حکومت کا مقصد موجودہ پیچیدہ سلیب نظام کی جگہ یکساں نرخ نافذ کرنا ہے، جبکہ کم آمدن والے صارفین کیلئے مالی معاونت کے ذریعے ریلیف فراہم کیا جائے گا۔
