اسلام آباد( پاکستان خبر) وزیراعظم شہباز شریف نے کہا ہے کہ بیرون ملک مقیم پاکستانیوں کو جدید اور آسان سہولیات فراہم کرنا حکومت کی اولین ترجیح ہے۔وزیراعظم کو وزارت خارجہ کی جانب سے سفارتخانوں میں سہولیات کے فروغ، دستاویزات کی تصدیق کے نظام کو ڈیجیٹل بنانے، شکایات کے اندراج کو آسان بنانے اور بیرون ملک سے پاکستان میں مختلف خدمات اور ادائیگیوں کے لیے جدید ڈیجیٹل نظام پر بریفنگ دی گئی۔اجلاس میں وزارت خارجہ، مختلف ممالک میں تعینات پاکستانی سفرا، وزارت داخلہ، ایف آئی اے، وزارت آئی ٹی اور دیگر متعلقہ اداروں کے اعلیٰ حکام نے بھی شرکت کی اور پیش رفت سے آگاہ کیا۔شہباز شریف نے کہا کہ اوورسیز پاکستانی ملک کا قیمتی سرمایہ ہیں، ان کی سہولت کے لیے پاور آف اٹارنی، جائیداد کی خرید و فروخت اور دستاویزات کی تصدیق کے عمل کو آسان بنانے کے لیے کیو آر کوڈ کا نظام متعارف کرایا جا چکا ہے۔وزیراعظم نے ہدایت کی کہ سفارتخانوں میں کیو آر کوڈ نمایاں طور پر آویزاں کیے جائیں اور بیرون ملک پاکستانیوں کو اس نظام کے ذریعے شکایات درج کرانے کے لیے بھرپور آگاہی مہم چلائی جائے تاکہ زیادہ سے زیادہ افراد اس سہولت سے فائدہ اٹھا سکیں۔اجلاس کو بتایا گیا کہ اسلام آباد میں وزارت خارجہ کے دفتر میں شام کی شفٹ کا آغاز کر دیا گیا ہے، جبکہ آسان خدمت مرکز میں بھی دستاویزات کی تصدیق کی سہولت فراہم کی جا رہی ہے۔ مزید برآں کورئیر کے ذریعے تصدیق کا نظام متعارف کرانے کے ساتھ ہائر ایجوکیشن کمیشن، انٹر بورڈز کوآرڈینیشن کمیشن، نادرا اور نیشنل پولیس بیورو کے ڈیٹا بیس کو بھی اس نظام سے منسلک کر دیا گیا ہے، جس سے تصدیقی عمل مزید تیز ہو گیا ہے۔حکام نے بریفنگ میں بتایا کہ دستاویزات کی تصدیق کا عمل اب ون اسٹاپ نظام کے تحت انجام دیا جا رہا ہے، جبکہ آئندہ مرحلے میں پورے نظام کو مکمل طور پر ڈیجیٹل بنانے کے لیے موبائل ایپلی کیشن تیار کی جا رہی ہے، جس کے ذریعے پیدائش، وفات، شادی اور فیملی رجسٹریشن سمیت مختلف سرکاری دستاویزات کی آن لائن تصدیق بھی ممکن ہوگی۔
