اسلام آباد ( پاکستان خبر) پاکستان 12 اور 13 جولائی کو خواتین سے متعلق اسلامی تعاون تنظیم (او آئی سی) کی وزارتی کانفرنس کی میزبانی کرے گا۔نائب وزیراعظم اور وزیر خارجہ اسحاق ڈار نے کانفرنس کے کامیاب انعقاد کے لیے تمام متعلقہ اداروں کو متحرک رہنے کی ہدایت کی ہے۔ترجمان دفتر خارجہ کے مطابق اس حوالے سے نائب وزیراعظم کی زیر صدارت اعلیٰ سطح کمیٹی کا چھٹا اجلاس ہوا، جس میں کانفرنس کی تیاریوں کا تفصیلی جائزہ لیا گیا۔اجلاس میں کانفرنس کے ایجنڈا، سیکیورٹی انتظامات، پروٹوکول اور لاجسٹکس پر غور کیا گیا، جبکہ میڈیا حکمت عملی اور بین الوزارتی رابطوں کا بھی جائزہ لیا گیا۔رپورٹ کے مطابق کانفرنس میں او آئی سی کے 57 رکن ممالک کے نمائندگان شریک ہوں گے۔نائب وزیراعظم اسحاق ڈار نے وزارت انسانی حقوق کی تیاریوں پر اطمینان کا اظہار کرتے ہوئے تمام اداروں کو قریبی رابطہ رکھنے اور بروقت انتظامات مکمل کرنے کی ہدایت کی۔
