اسلام آباد( پاکستان خبر) پاکستان اور امریکا کے درمیان انسدادِ دہشت گردی مذاکرات کا چوتھا دور واشنگٹن ڈی سی میں منعقد ہوا، جس میں دونوں ممالک نے دہشت گردی کے مشترکہ خطرات سے نمٹنے کے لیے تعاون مزید مضبوط بنانے کے عزم کا اظہار کیا۔دفتر خارجہ کے ترجمان کے مطابق مذاکرات کے دوران علاقائی اور عالمی سطح پر دہشت گردی سے درپیش چیلنجز پر تفصیلی بات چیت ہوئی، جبکہ دوطرفہ تعاون بڑھانے کے مختلف پہلوؤں کا جائزہ لیا گیا۔مذاکرات میں امریکی انسدادِ دہشت گردی رابطہ کار گریگوری لوگیرفو اور پاکستان کے خصوصی سیکرٹری خارجہ سفیر نبیل منیر نے اپنے اپنے وفود کی قیادت کی۔دونوں ممالک کے نمائندوں نے دہشت گردی کے خلاف مشترکہ مفادات کے تحفظ، معلومات کے تبادلے اور باہمی تعاون کو مزید مؤثر بنانے پر زور دیا۔جاری اعلامیے کے مطابق پاکستانی اور امریکی وفود نے دہشت گردی کے موجودہ خطرات کی صورتحال پر غور کیا اور اس شعبے میں مسلسل رابطوں، تعاون اور مشترکہ اقدامات جاری رکھنے پر اتفاق کیا۔
