اسلام آباد( پاکستان خبر) پاکستان نے کرغزستان کے ساتھ دوطرفہ تجارت کا حجم 2 ارب ڈالر تک بڑھانے کے عزم کا اظہار کیا ہے۔وزیراعظم شہباز شریف نے تقریب سے خطاب کرتے ہوئے کہا کہ پاکستان اور کرغزستان کے درمیان ٹرانزٹ تجارت کا معاہدہ خوش آئند ہے، دونوں ممالک کے درمیان تجارتی حجم میں اضافے کیلئے قوانین اور ضوابط کو مزید بہتر بنایا جائے گا۔پاکستان اور کرغزستان کے درمیان مختلف شعبوں میں معاہدوں اور مفاہمتی یادداشتوں پر دستخط اور دستاویزات کے تبادلے کی تقریب منعقد ہوئی، جس میں وزیراعظم شہباز شریف اور کرغزستان کے صدر صادر ژاپاروف بھی شریک ہوئے۔تقریب کے دوران پاکستان اور کرغزستان کی وزارت خارجہ کے درمیان تعاون کے پروگرام سے متعلق دستاویز کا تبادلہ کیا گیا۔ انسٹی ٹیوٹ آف اسٹریٹجک اسٹڈیز اسلام آباد اور کرغز نیشنل انسٹی ٹیوٹ فار اسٹریٹجک انیشی ایٹو کے درمیان مفاہمتی یادداشت کا بھی تبادلہ ہوا۔دونوں ممالک کے درمیان ٹرانزٹ تجارت سے متعلق معاہدے پر بھی دستخط ہوئے، جبکہ وزارت تعلیم کے درمیان تعاون کے حوالے سے مفاہمتی یادداشت کا تبادلہ بھی کیا گیا۔
