اسلام آباد (پاکستان خبر) مشیر برائے وزیر اعظم رانا ثناء اللہ نے کہا ہے کہ پاکستان خطے میں امن و استحکام کے لیے اپنا مثبت کردار جاری رکھے گا۔انہوں نے یہ بات امریکی سفارت خانے کے سیاسی امور کے وزیر مشیر ٹیری سٹیئرز گونزالیز سے ملاقات کے دوران کہی، جس میں پاک امریکا دوطرفہ تعلقات اور علاقائی صورتحال سمیت باہمی دلچسپی کے امور پر تبادلہ خیال کیا گیا۔ملاقات کے دوران دونوں فریقین نے خطے میں امن و استحکام کے فروغ کی اہمیت پر زور دیا، جبکہ امریکی نمائندے نے اس حوالے سے پاکستان کے کردار کو سراہا۔امریکی سفارتی اہلکار نے کہا کہ ایران اور امریکہ کے درمیان مذاکرات کے فروغ کے لیے پاکستان کی سفارتی کوششیں قابلِ تعریف ہیں۔رانا ثناء اللہ نے کہا کہ پاکستان ہمیشہ سے مسائل کے حل کے لیے مذاکرات اور سفارت کاری کو ترجیح دیتا آیا ہے اور خطے میں امن کے لیے اپنا کردار آئندہ بھی جاری رکھے گا۔دونوں فریقین نے پاکستان اور امریکہ کے درمیان اعلیٰ سطحی روابط کو مزید فروغ دینے کی ضرورت پر بھی اتفاق کیا۔
